مکتب کا نظام وقت کی اہم ضرورت
Maulana Khalid Saifullah Rahmani
موجودہ حالات میں مسلمانوں کے لئے یہ ضروری ہے کہ وہ اگلی نسلوں کو دین سے وابستہ رکھنے کے طریقۂ کار پر غور کریں اور ایسا راستہ اختیار کریں کہ ہمارے بچے عصری تعلیم میں بھی آگے ہوں اور ان کی دینی پہچان بھی پوری طرح قائم رہے ، اس کیلئے سب سے مفید اور آزمودہ طریقہ مکاتب کا نظام ہے۔
بچوں کے لئے دینی مکاتیب کے نظام کو بدرجۂ اولیٰ اہمیت دینی چاہئے۔ تصویر: آئی این این
قرآن مجید میں جن اولوالعزم پیغمبروں کا ذکر آیا ہے ، ان میں ایک اہم ترین شخصیت حضرت یعقوب علیہ الصلوٰۃ والسلام کی ہے ، جن کا مختلف عنوان کے تحت قرآن میں سولہ بار ذکر آیا ہے ۔ ان کے والد حضرت اسحاق علیہ السلام تھے ، جن کا ایک نام اسرائیل بھی ہے ۔ بنی اسرائیل دراصل ان کی اولاد ہیں اور رسول اﷲ ﷺ کے علاوہ مصر اور عراق کے خطہ میں حضرت یعقوب علیہ السلام کے چچا حضرت اسماعیل علیہ السلام بھی خدا کے اولوالعزم پیغمبروں میں ہیں جن کو ان کے والد حضرت ابراہیم علیہ السلام نے خدا کی رضا کے لئے قربان کیا تھا اورعید قرباں ان ہی کی یادگار کے طورپر منائی جاتی ہے۔ حضرت یعقوب علیہ السلام کے دادا ابوالانبیاء حضرت ابراہیم علیہ السلام ہیں جنہوں نے تعمیر کعبہ کی تجدید فرمائی ، حج کے زیادہ تر افعال حضرت ابراہیم ؑ کی قربانیوں اور فرمانبرداریوں کی یاد کو تازہ کرنے کا باعث ہیں اور دنیا کے تین بڑے مذاہب یہودیت ، عیسائیت اور اسلام آپ علیہ السلام کی عظمت پر متفق ہیں ۔قرآن نے خاص طورپر حضرت ابراہیم علیہ السلام کے توحید پر ایمان و ایقان کا ذکر کیا ہے اور اس سلسلہ میں ابتلاؤں اور آزمائشوں میں پورا اُترنے کے واقعات کو تفصیل سے بیان کیا گیا ہے چنانچہ آج جو مذاہب توحید کا اقرار کرتے ہیں ، وہ سبھی حضرت ابراہیم ؑ سے اپنا رشتہ جوڑتے ہیں ، حضرت یعقوب ؑ کے صاحبزادے حضرت یوسف علیہ السلام ہیں ، جن کے واقعہ پر قرآن مجید میں ایک مکمل سورہ ’’یوسف ‘‘ کے نام سے موجود ہے اور ان کی داستانِ زندگی کو اﷲ تعالیٰ نے احسن القصص کے نام سے ذکر فرمایا ہے ، گویا حضرت یعقوب علیہ السلام کا پورا خانوادہ نبیوں اور رسولوں کا خانوادہ ہے جس میں باپ ، چچا، دادا ، بیٹا ، سب اﷲ کے پیغمبر ہیں۔ اس سے اندازہ کیا جاسکتا ہے کہ اس خاندان میں کس قدر دین داری ، تقویٰ اور خشیت ِالٰہی رہی ہوگی اور گھر کے پورے ماحول پر کیسی اعلیٰ دینی فضاء سایہ فگن ہوگی۔ ایسے دین دار گھرانے کے افراد سے گناہ اور معصیت کا اندیشہ بھی لوگوں کو نہیں ہوتا ، چہ جائے کہ کفر و شرک کا خوف ان سے ہو ؛ لیکن جب حضرت یعقوبؑ کی وفات کا وقت آیا تو انھوں نے اپنے صاحبزادوں سے سوال کیا’’میرے بعد تم کس کی عبادت کروگے ؟ صاحبزادوں نے جواب دیا : ہم آپ کے خدا ، آپ کے باپ دادا ابراہیمؑ ، اسماعیلؑ اور اسحاقؑ کے خدا یعنی ایک ہی خدا کی عبادت کریں گے اور ہم اسی کے فرمانبردار رہیں گے ۔‘‘(بقرہ: ۱۳۳)
اسی طرح سیدنا حضرت ابراہیم علیہ الصلوٰۃ والسلام نے اپنی وفات کے وقت اپنے بیٹوں کو جو خود نبی تھے وصیت فرمائی :
’’بے شک اﷲ نے تمہارے لئے دین کو پسند فرما لیا ہے ؛ اس لئے اسلام ہی کی حالت میں تمہیں موت آنی چاہئے ۔‘‘(بقرہ: ۱۳۲)
غور کیجئے ! کہ انبیاء کرام اپنے بچوں کے سلسلہ میں اس بات کے فکر مند ہیں کہ وہ دین پر قائم رہیں اور ان کو دین پر قائم رہنے کی حالت میں موت آئے ، جب انبیاء کو اپنی اولاد کے بارے میں اتنی زیادہ فکر مندی تھی ، تو اس سے اندازہ لگایا جاسکتا ہے کہ عام مسلمانوں کو اس سلسلہ میں کتنا زیادہ فکر مند رہنے کی ضرورت ہے۔ آج ہماری نفسیات یہ ہے کہ ہم اپنی خاندانی روایات پر یقین کرکے اپنے بال بچوں کے بارے میں مطمئن ہوجاتے ہیں کہ ہمارے بچے اسی دین کے حامل رہیں گے ، جو ہمیں ہمارے ماں باپ کی طرف سے ملا ہے ۔
راقم الحروف کو متعدد مغربی ملکوں کے سفر کا موقع ملا ہے ۔یہ ایک حقیقت ہے کہ مغربی ملکوں نے مذہب سے اپنا رشتہ پوری طرح توڑ لیا ہے اور اگر کوئی اپنے آپ کو عیسائی کہتا ہے تو وہ محض روایات کے طورپر ایک تہذیب کے نقطۂ نظر سے عیسائی ہے ، یعنی کچھ مذہبی رسوم ہیں ، جو بطورِ عقیدہ کے انجام نہیں دی جاتیں بلکہ اب وہ تہذیب اور روایت کا حصہ بن چکی ہیں ، لیکن اﷲ کا شکر ہے کہ جو مسلمان وہاں آباد ہیں اور خاص کر گجراتی مسلمان ، کہ ہندوستان سے زیادہ تر وہی اس ملک میں پہنچے ہیں ان کی نئی نسل میں بھی دین داری کا رجحان بہت ہی قابل تعریف اور لائق تحسین ہے ۔ ایک ایسے ملک میں جہاں یوں محسوس ہوتا ہے کہ لباس عورتوں کے لئے ناقابل برداشت بوجھ ہے ، اور جہاں نوجوان لڑکے نت نئے فیشن کے پرستار ہیں ، وہاں بھی مسلمان خواتین کی اچھی خاصی تعداد برقع پوش ہے ، یا کم سے کم چہرہ کے علاوہ پورا جسم بشمول سر ،ڈھکا ہوا ہے، نوجوان لڑکے باریش ہیں اور ان کی اچھی خاصی تعداد مشرقی لباس اور اسلامی وضع قطع کی حامل ہے ۔اس کے اسباب یوں تو گھریلو ماحول اور طبعی سلامت رَوی ، دینی تحریکوں اور جماعتوں سے تعلق اور خاص کر حضرت مولانا محمد الیاس صاحبؒ کی تحریک دعوت و تبلیغ کی محنت علماء اورمشائخ سے تعلق و ارتباط وغیرہ بھی ہے ؛ لیکن سب سے اہم کردار اس میں نظام مکاتب کا ہے۔ ریاست ِگجرات میں بہت زمانہ سے ایک نظام یہ ہے کہ گاؤں گاؤں میں مکاتب قائم ہیں ، جو طلبہ عصری درسگاہوں میں پڑھتے ہیں ان کے لئے ان مکاتب میں پڑھنا ضروری سمجھا جاتا ہے ، یہاں تک کہ اگر کوئی بچہ مکتب کے اوقات میں کھیلتا ہوا مل جائے تو محلہ کے لوگ بے تکلف بچہ کے سرپرست سے پوچھ بیٹھتے ہیں کہ یہ مکتب نہیں جارہا ہے ؟ اور سرپرست کو شرمسار اور معذرت خواہ ہونا پڑتا ہے۔ عام طورپر مکتب کی تعلیم سے ذہن اس طرف جاتا ہے کہ یہاں قاعدۂ بغدادی اورپارۂ عم جیسے تیسے پڑھادیا جائے اور چند کلمات اور دُعائیں یاد کروا دی جائیں ، بس یہ کافی ہے ، یقیناً کچھ نہ ہونے کے مقابلے میں ہونا بہتر ہے ؛ لیکن گجرات کے نظم مکاتب کی سطح اس سے بہت بلند ہے۔ یہاں عام طورپر میٹرک تک آٹھ دس سال مکتب کی تعلیم ہوتی ہے ، روزانہ ڈھائی گھنٹہ بچوں کا وقت لیا جاتا ہے۔، ایک معلم پندرہ ، بیس طلبہ کو پڑھاتا ہے۔ ناظرہ قرآن تجوید کے ساتھ پڑھایا جاتا ہے، کچھ پارے حفظ کرائے جاتے ہیں ، پھر اس کے ساتھ ساتھ آیات و احادیث کے ترجمے ، ایمانیات ، مسائل و احکام ، سیرتِ نبویؐ وغیرہ کی تعلیم دی جاتی ہے اور بعض جگہوں پر عربی زبان کی ابتدائی کتابیں بھی پڑھائی جاتی ہیں ۔گجرات کے مسلمان تاجر پوری دنیا میں پھیلے ہوئے ہیں ، وہ جہاں بھی گئے مکتب کا یہ نظام اپنے ساتھ لے گئے ، اس لئے ان کی نئی نسل پر دین داری کی جھلک نمایاں طورپر محسوس کی جاتی ہے ، چاہے وہ کتنے ہی مخالف ِاسلام ماحول میں ہوں ، وہ دوسرے مسلمانوں سے اپنے دینی ربط و تعلق کی بناء پر نمایاں محسوس ہوتے ہیں۔ برطانیہ میں چونکہ ۱۶؍ سال کی عمر تک سرکاری نصاب کے مطابق تعلیم حاصل کرنا ہر بچہ پر لازم ہے ، اس لئے اتنی عمر تک بچے پابندی سے مکتب کی تعلیم حاصل کرتے ہیں اور اس طرح وہ نیم مولوی تو ہوہی جاتے ہیں اور بعض طلبہ تو قرآن مجید کا حفظ بھی مکمل کرلیتے ہیں ۔بعض اہل بصیرت کا گمان ہے کہ ایشیاء میں جو ملک سب سے پہلے مغربی تہذیب کے سامنے سرنگوں ہوجائے گا اور جو تیزی سے مغرب کی پیروی کی طرف جارہا ہے ، وہ ہمارا ملک ہندوستان ہے اور مغربی ممالک کو چوںکہ افرادی وسائل کی ضرورت ہے اور ہندوستان کے نوجوان ذہانت ، صلاحیت ، محنت اور فنی مہارت کے ساتھ ساتھ مغربی تہذیب کو قبول کرنے کا مزاج بھی رکھتے ہیں ، اسی لئے یہاں کے کارکنان ان کے لئے سب سے زیادہ قابل قبول ہیں ۔ان حالات میں مسلمانوں کے لئے یہ ضروری ہے کہ وہ اگلی نسلوں کو دین سے وابستہ رکھنے کے طریقۂ کار پر غور کریں اور ایسا راستہ اختیار کریں کہ ہمارے بچے عصری تعلیم میں بھی آگے ہوں اور دینی پہچان بھی پوری طرح قائم رہے ، اس کے لئے سب سے مفید اور آزمودہ طریقہ مکاتب کا نظام ہے ، کہ زیادہ سے زیادہ مکاتب قائم ہوں۔ یہ مکاتب صرف رسمی انداز کے نہ ہوں ؛ بلکہ اس کا دس سالہ کورس ہو ، جس میں ناظرہ قرآن ، حفظ ، منتخب آیات و احادیث کے ترجمے ، عبادات و معاملات اور شخصی زندگی سے متعلق ضروری احکام ، نیز رسول اﷲ ﷺ اورانبیاء کرام کی سیرت اور تاریخ ہند جیسے اہم مضامین شامل نصاب ہوں اور ان کی باضابطہ تعلیم ہوا کرے ، اُردو زبان بھی اس نصاب کا ایک اہم جزو ہو اور ان طلبہ کو اچھی طرح اُردو لکھنا اور پڑھنا آجائے ؛ تاکہ وہ اپنے اسلاف کے علمی ورثہ سے جڑے رہیں۔ علماء کو ان کا علم ، مشائخ کو ان کی دینی نسبت اور دعوتی کام کرنے والوں کو ان کی دعوتی وابستگی انہیں اپنے بچوں کی طرف سے بے پروا نہ کردے اور یہ خیال نہ پیدا ہوجائے کہ ہماری یہ دینی وابستگی لازمی طورپر ہماری آنے والی نسلوں کو بھی دین سے مربوط رکھے گی۔ حضرت ابراہیم علیہ السلام اورحضرت یعقوب علیہ السلام جیسے اولوالعزم پیغمبروں کے اُسوہ کو یاد رکھیں کہ پورا خاندان نبوت کے نور سے منور ہے ، اس کے باوجود انہیں اپنی وفات کے وقت یہی فکر دامن گیر ہے کہ ہماری اولاد دین پر قائم رہے گی یا نہیں ؟ ہم اپنے گریبانوں میں جھانک کر دیکھیں کہ کیا کبھی ہم نے اس پر غور کیا ہے ؟ اور کیا ہم نے بھی کبھی اپنی اولاد سے وہی استفسار کیا ہے جو آپؑ نے کیا تھا کہ مَا تَعْبُدُوْنَ مِنْ بَعْدِیْ ؟
