حقیقت میں وقت کا ولی کون ....؟

حقیقت میں وقت کا ولی کون ....؟

سید ابولاعلی مودودیؒ سے ایک دفعہ کسی نے پوچھا کہ آپ نے کبھی کسی ولی اللہ کو دیکھا ہے ؟
سید مودودیؒ نے جواب دیا ہاں ابھی دو دن پہلے ہی لاہور اسٹیشن پر دیکھا ہے ۔ ہماری گاڑی جیسے ہی رکی تو قلیوں نے دھاوا بول دیا اور ہر کسی کا سامان اٹھانے اور اٹھا اٹھا کر بھاگنے لگے  لیکن میں نے ایک قلی کو دیکھا کہ وہ اطمینان سے نماز میں مشغول ہے ۔

جب اس نے سلام پھیرا تو میں نے اسے سامان اٹھانے کو کہا اس نے سامان اٹھایا  اور میری مطلوبہ جگہ پر پہنچا دیا، میں نے اسے ایک روپیہ کرایہ ادا کردیا ، اس نے چار آنے اپنے پاس رکھے اور باقی مجھے واپس کر دئیے ۔ میں نے اس سے عرض کی کہ ایک روپیہ پورا رکھ لو  لیکن اس نے مسکراتے ہوئے جواب دیا “نہیں صاحب میری مزدوری چار  آنے ہی بنتی ہے” ۔

آپ یقین کریں ہم سب ولی اللہ بننے اور اللہ کے ولیوں کو ڈھونڈنے میں دربدر ذلیل و خوار ہوتے ہیں ۔
ہم سمجھتے ہیں کہ ہمیں مشکل ترین ریاضتوں ، مشقتوں اور مراقبوں سے گذرنا پڑےگا ۔ سار ی ساری رات نوافل میں گذارنی پڑےگی یا شاید گلے میں تسبیح ڈال کر میلے کچیلے کپڑے پہن کر اللہ ہو کی صدائیں لگانا پڑے گی تب ہم ولی اللہ کے درجے پر پہنچ جائیں گے ۔

آپ کمال ملاحظہ کریں ہماری آدھی سے زیادہ قوم بھی اسی کو ہی  ” پہنچا “  ہوا سمجھتی ہے جو ابنارمل حرکتیں کرتا نظر  آئیگا ۔
جو رومال میں سے کبوتر نکال دے یا عاشق کو آپ کے قدموں میں ڈال دے ۔ یا بیس سال سے نہایا نہ ہو ، جو فرائض کو ادا نہ کرتا ہو ، جو نبی کریم صلی اللّٰہ علیہ وسلم کی سنتوں پر عمل پیرا نہ ہو

اللہ کا دوست بننے کے لیے تو اپنی انا کو مارنا پڑتا ہے ۔ قربانی ، ایثار اور انفاق ( اللہ کی راہ میں مال خرچ کرنا) کو اپنی ذات کا حصہ بنانا پڑتا ہے ۔

اشفاق صاحب کہتے ہیں کہ ایک دفعہ میں نے اپنے ابا جی سے پوچھا کہ عشق مجازی اور عشق حقیقی میں کیا فرق ہے ؟

انھوں نے کچھ دیر سوچا اور کہنے لگے

“بیٹا ! کسی ایک کے آگے اپنی انا کو مارنا عشق مجازی ہے اور ساری دنیا کے سامنے اپنی انا کو مار لینا عشق حقیقی ہے” ۔

جنید بغدادی اپنے وقت کے نامی گرامی شاہی پہلوان تھے ۔ انکو ایک دفعہ انتہائی کمزور ، نحیف اور لاغر شخص نے کشتی کا چیلنج کر دیا  ۔
میدان تماشائیوں سے بھرا ہوا تھا ۔ بادشاہ اپنے پورے درباریوں کے ساتھ جنید بغدادی کا مقابلہ دیکھنے  آ چکا تھا ۔مقابلہ شروع ہونے سے پہلے وہ کمزور آدمی جنید بغدادی کے قریب آیا اور کہا دیکھو جنید ! کچھ دنوں بعد میری بیٹی کی شادی ہے میں انتہائی غریب اور مجبور انسان ہوں ۔
اگر تم ہار گئے تو بادشاہ مجھے انعام و اکرام سے نوازے گا ۔ لیکن اگر میں ہار گیا تو اپنی بیٹی کی شادی کا بندو بست کرنا میرے لیے مشکل ہو جائے گا ۔

مقابلہ ہوا اور جنید بغدادی ہار گئے ۔ بادشاہ کو اپنی آنکھوں پر یقین نہ آیا اس نے دوبارہ اور پھر تیسری بار مقابلہ کروایا اور تینوں دفعہ ہار جنید بغدادی کے حصے میں آئی ۔

بادشاہ نے سخت غصے میں حکم دیا جنید کو میدان سے باہر جانے والے دروازے پر بٹھا دیا جائے اور تمام تماشائیوں کو حکم دیا گیا کہ جو بھی جائے گا جنید پر تھوکتا ہوا جائے گا ۔

جنید بغدادی کی انا خاک میں مل گئی لیکن ان  کی " ولایت" کا فیصلہ قیامت تک کے لیے آسمانوں پر سنا دیا گیا ۔

" ولی" تو وہ ہوتا ہے جو لوگوں کی زندگیوں میں آسانیاں پیدا کر دے ۔
جو کسی کو جینے کی امنگ دے دے ۔
چہرے پر خوشیاں بکھیر دے ۔
جب کبھی بحث کا موقع آئے تو اپنی دلیل  اور حجت روک کر سامنے والے کے دل کو ٹوٹنے سے بچا لے  اس سے بڑا  "ابدال" بھلا کون ہو گا ؟

رسول خداﷺ نے حضرت معاذ بن جبلؓ سے فرمایا :

”معاذؓ ! تمہیں وہ عمل نہ بتاؤں جو بغیر حساب کتاب کے تمہیں جنت میں داخل کروا دے ؟”

معاذؓ نے عرض کی ضرور یا رسول اللہﷺ ۔
آپ نے فرمایا :”معاذ ! مشقت کا کام ہے کرو گے ؟”
ضرور کروں گا یارسول اللہﷺ ،معاذ نے جواب دیا ۔
آپﷺ نے پھر فرمایا :”معاذ مسلسل کرنے کا کام ہے کرو گے ؟”
معاذؓ نے جواب دیا کیوں نہیں یا رسول اللہﷺ ۔

آپ نے فرمایا:” اے معاذ ! اپنے دل کو ہر ایک کے لیے شیشے کی طرح صاف اور شفاف رکھنا بغیر حساب کتاب کے جنت میں داخل ہو جاؤ گے” ۔

معروف کرخیؒ نے فرمایا جس کا ظاہر اس کے باطن سے اچھا ہے وہ " مکار" ہے
اور جس کا باطن اس کے ظاہر سے اچھا ہے وہ اللہ کا " ولی" ہے ۔

ولایت شخصیت میں نہیں کردار میں نظر آتی ہے ۔

ابراہیم بن ادھمؒ کی خدمت میں ایک شخص حاضر ہوا اور چند دن رہنے کی اجازت مانگی آپ نے دے دی ۔ وہ کچھ دن ساتھ رہا اور انتہائی مایوس انداز میں واپس جانے لگا ۔

ابراھیم بن ادھمؒ نے پوچھا کیا ہوا برخوردار ! کیوں آئے تھے اور واپس کیوں جا رہے ہو ؟

اس نے کہا حضرت آپ کا بڑا چرچا سنا تھا ۔ اس لیے آیا تھا کہ دیکھوں کہ آپ کے پاس کونسی کشف و کرامات ہیں ۔
اتنا بول کر وہ نوجوان خاموش ہوگیا ۔

ابراھیم بن ادھمؒ نے پوچھا پھر کیا دیکھا ؟

کہنے لگا میں تو سخت مایوس ہو گیا ۔ میں نے تو کوئی کشف اور کرامت وقوع پذیر ہوتے نہیں دیکھی ۔
ابراھیم بن ادھمؒ نے پوچھا نوجوان ! یہ بتاؤ  اس دوران تم نے میرا کوئی عمل خلاف شریعت دیکھا ؟
یا کوئی کام اللہ اور اس کے رسول صلی اللہُ علیہ والہ و سلم کے فرمان کے خلاف دیکھا ہو ؟

اس نے فورا ًجواب دیا نہیں ایسا تو  واقعی کچھ نہیں دیکھا ۔
ابراھیم بن ادھمؒ مسکرائے اس کے کندھے پر ہاتھ رکھا اور بولے بیٹے ! میرے پاس اس سے بڑا کشف اور اس  سے بڑی کرامت کوئی اور نہیں ہے ۔

" جو شخص فرائض کی پابندی کرتا ہو ۔
کبیرہ گناہوں سے اجتناب کرتا ہو ۔
لوگوں کی زندگیوں میں آسانیاں پیدا کرتا ہو ۔
آپ مان لیں کہ اس سے بڑا " ولی " کوئی نہیں ہو سکتا  ۔"

اللہ کے ولی کی سب سے بڑی نشانی یہ ہے کہ وہ " صاحب حال" ہوتا ہے ۔
" نہ ماضی پر افسوس کرتا ہے اور نہ مستقبل سے خوفزدہ ہوتا ہے ۔"
اپنے حال پر خوش اور شکر گزار رہتا ہے ۔

" جو اپنے سارے غموں کو ایک غم یعنی "آخرت" کا غم بنا کر دنیا کے غموں سے آزاد ہو جائے وہی "وقت کا ولی"  ہے ۔

ایک صحابیؓ نے پوچھا یارسول اللہﷺ" ایمان " کیا ہے ؟
آپ نے فرمایا صبر کرنا اور معاف کرنا ۔

آپ یقین کریں تہجد پڑھنا ، روزے رکھنا آسان ہے لیکن کسی کو معاف کرنا بہت مشکل ہے ۔

رسول اللہﷺ نے فرمایا اسلام کا حسن یہ ہے کہ بھوکوں کو کھانا کھلاؤ
اور ہمیشہ اچھی بات زبان سے نکالو ۔
جو صبر کرنا سیکھ لے ،
بھوکوں کو کھانا کھلائے ،
ہمیشہ اچھی بات اپنی زبان سے نکالے اور لوگوں کے لیے اپنے دل کو صاف کر لے اس سے بڑا  "ولی"  بھلا اور کون ہو سکتا ہے ؟

یاد رکھیں

جو لوگوں سے شکوہ نہیں کرتا جس کی زندگی میں اطمینان ہے وہی" ولی" ہے ۔

جس کے دل کی دنیا میں آج " جنت" ہے وہی وہاں " جنتی" ہے

اور جس کا دل ہر وقت شکوے ، شکایتوں ، حسد ، کینہ ، بغض ، لالچ اور ناشکری کی " آگ" سے سلگتا  ہے وہاں بھی اس کا ٹھکانہ " آگ" ہی ہے ۔

لہٰذا محترم بہنوں اور بھائیو

فرائض کی پابندی کیجیے ،
کبیرہ گناہوں سے اجتناب کیجیے ،
حال پر خوش رہیے ،
لوگوں کی زندگیوں میں آسانیا ں پیدا کیجیے ،
اپنے دلوں کو صاف رکھیے

اور وقت کے " ولی" بن جائیے ۔

جزاک اللہ خیرا

اپنی دعاؤں میں یاد رکھیے گا
اور خود بھی اللہ کے ولی بنئیے اور اس پوسٹ کو شئیر کرکے اپنے بہن بھائیوں اور رشتہ داروں دوست احباب کو بھی اللہ کے ولی بننے کی دعوت دیجئے